Apirilaren 5eko azokan, honen sustapenerako deskontu bonuak salgai izango dira azken aldiz
Azokan 20 euro gastatu daitezke; erosleak 10 euro jartzen ditu eta Udalak beste 10 eta astearteko azokan ere erabili daitezke
Azokan kontsumoa bultzatzeko erosketa bonuen eskaintza larunbat honetan amaituko da. Apirilaren 5ean jarriko dira azkenekoz salgai Udalak kaleratzen dituen azokako erosketa bonuak. Bonu hauek 20 euroko balioa dute, baina erosleek 10 eurotan eskuratu ahal izango dituzte (Udalak jartzen ditu beste 10 euroak) asmoz.
Larunbat goizean ospatuko den bertako produktuen azokak garaian garaiko barazki fresko eta osasungarri hauek izango ditugu, besteak beste, babak, azelgak, ziazerbak, letxugaren kukuluak, azak, baratxuri freskoak eta beste hainbat produktu gehiago. Tailer didaktikoaren orduan, Arteka dekorazio dendako arduradunak edalontziak erabilita apaingarriak egiten erakutsiko du bertaratzen direnei.
Egitaraua:
- 10:00 Bertako produktuen azokaren hasiera.
- 11:30 Edalontziak erabilita apaingarriak egiten ikasteko tailerra Artekaren eskutik.
- 12:00 Loinatz Udal Musika Eskolako trikitilariek eta pandero jotzaileek azoka girotuko dute.
- 13:30 Azokako produktuez osatutako 2 saskiren zozketa azokan erosketak egindakoen artean.
- 14:00 Bertako produktuen azokaren amaiera.
Bertako produktuak dastatu, erosle eta ekoizleen arteko harremanak indartu eta ingurumena zaindu, hiru helburu beste askoren artean, batzen direnak Beasaingo azokan. Ekoizleen eta baserritarren lana balioan jartzea garrantzitsua da, baita kontsumitzaileek azoka eta bertako produktuak ezagutu eta horiek kontsumitzeak dituen onurak ezagutzera ematea. Bezero gazteak erakartzea eta harremanak sustatzeko topagune izatea ere ezinbestekoa da azokak berarekin dituen onurek iraupena izan dezaten belaunaldi berrien artean.
